अहमदनगर/विशेष प्रतिनिधी/पोलीस दक्षता लाईव्ह:- शहरातून वाहणाऱ्या सीना नदीचे पात्र व पूररेषेची निश्चितीबाबत जलसंपदा अधिकाऱ्यांच्या मदतीने महापालिकेने नकाशानुसार प्रत्यक्ष मोजणी करून हद्द निश्चितीची मोहीम सुरू केली आहे. नव्याने निश्चित केलेल्या या पूररेषेत सुमारे ३० ते ३५ हजार बांधकामे अडचणीत येण्याची शक्यता आहे. दरम्यान, यापुढे पूररेषेत बांधकामांना परवानगी दिली जाणार नाही, असे आयुक्त डॉ. पंकज जावळे यांनी सांगितले.
अहमदनगर शहरात सीना नदीचे १४ किलोमीटरचे पात्र आहे. कुकडी पाटबंधारे विभागाने खासगी एजन्सीची नियुक्ती करून २०२१ मध्ये महापालिकेला नकाशे सादर केले हाेते. आता दाेन वर्षांनंतर प्रशासनाला जाग येऊन हद्द व पूररेषेची अंमलबजावणी सुरू आहे. नागापूर येथील पुलापासून हे काम सुरू करण्यात आले आहे. सीना नदीपात्राची हद्द व पूररेषा याबाबत अनेक वर्षांपासून संभ्रम होता.
यापूर्वीच्या काळात महापालिकेने पूररेषेच्या खुणाही केल्या होत्या. मात्र, आता कुकडी पाटबंधारे विभागाने अधिकृतपणे हद्द व पूररेषा निश्चित केली आहे. दरम्यानच्या काळात नदीलगतच्या परिसरात शेकडो लेआऊट मंजूर झाले, याबाबत प्रशासन नेमकी काय भूमिका घेणार, हे पाहणे गरजेचे आहे.या निर्णयामुळे अनेक जण चिंतेत पडलेले दिसून आहे.