जळगाव | प्रतिनिधी | पोलीस दक्षता लाईव्ह:- एमआयडीसी परिसरातील जगवाणी नगर गेटसमोरील दुकानाचे शटर वाकवून १,८५,००० रुपयांच्या तांब्याच्या तारा चोरणाऱ्या अट्टल चोरट्याला पोलिसांनी गजाआड केले आहे. दि. १६ एप्रिल २०२५ रोजी रात्री ८ वाजता ते दि. २७ एप्रिल २०२५ रोजी दुपारी ४ वाजेपर्यंत हा चोरीचा प्रकार घडला होता. फिर्यादीच्या तक्रारीनुसार एमआयडीसी पोलीस स्टेशन येथे गुन्हा दाखल करण्यात आला होता.
गुन्ह्याचा तपास एमआयडीसी पोलीस निरीक्षक मा. बबन आव्हाड यांच्या मार्गदर्शनाखाली गुन्हे शोध पथकातील पोउनि राहुल तायडे, सफौ विजयसिंग पाटील, पोहेकॉ गणेश शिरसाळे, पोना प्रदीप चौधरी व पोकों निलेश पाटील यांच्याकडे सोपविण्यात आला. या प्रकरणात दोन आरोपींना दि. २ मे २०२५ रोजी अटक झाली होती, मात्र आरोपी क्र. ३ शिकवणसिंग बरियामसिंग उर्फ पटमलसिंग टाक हा गुन्हा घडल्यानंतर पसार झाला होता.
दि. ४ ऑगस्ट २०२५ रोजी वाघनगर परिसरात फिरत असल्याची माहिती गुप्त बातमीदारामार्फत मिळाल्यानंतर सफौ विजयसिंग पाटील व पोना प्रदीप चौधरी यांनी त्याला ताब्यात घेऊन पोलीस स्टेशनमध्ये हजर केले. न्यायालयाने त्याला दोन दिवसांची पोलीस कस्टडी दिली. चौकशीत त्याने २७,००० रुपये किंमतीचे, ५० किलो वजनाचे जुने व नवे तांब्याचे तार लपवून ठेवल्याचे कबूल केले. पोलिसांनी हा मुद्देमाल जप्त केला आहे.
ही कारवाई मा. पोलीस अधीक्षक श्री. महेश्वर रेड्डी, अप्पर पोलीस अधीक्षक श्री. अशोक नखाते, पोलीस उप अधीक्षक श्री. संदीप गावीत व पोलीस निरीक्षक बबन आव्हाड यांच्या मार्गदर्शनाखाली करण्यात आली.
