नशिराबाद/पोलीस दक्षता लाईव्ह टीम:- शनिवारी ३० सप्टेंबर रोजी मध्यरात्री १ वाजता नशिराबाद गावानजीक राष्ट्रीय महामार्गावरील टोल प्लाझा येथे निर्दयीपणे ५३ म्हशी बेकायदेशीरित्या व विनापरवाना तीन वाहनांमध्ये कोंबून घेऊन जाणारी वाहने नशिराबाद पोलीसांनी कारवाई करत जप्त केली आहेत. या कारवाई दरम्यान तीन जणांना ताब्यात घेतले असून ५३ म्हशी, तीन वाहने असा एकूण ३६ लाख ९० हजार रुपये किमतीचा मुद्देमाल जप्त केला आहे.
याबाबत अधिक माहिती अशी शनिवारी ३० सप्टेंबर रोजी रात्री १ वाजता नशिराबाद पोलीसांना विनापरवाना व बेकायदेशीर गुरांची वाहतूक सुरू असल्याची गोपनिय माहिती मिळाली. त्यानुसार नशिराबाद पोलिसांनी राष्ट्रीय महामार्गावर गस्त लावीत वाहने तपासणी केली.त्यावेळी तिनही वाहनाची तपासणी केली असता ज्या गाडीमध्ये म्हशींची वाहतूक केली जात होती त्या वाहनांमध्ये आत म्हशींसाठी खाली कोणतेही गादी टाकलेली नव्हती व त्यांच्या जवळ पशुवैद्यकीय अधिकाऱ्याचे कोणतेही प्रमाणपत्र आढळून आले नाही. दोन वाहनांमध्ये प्रत्येकी १८ व एका वाहनात १७ अशा एकूण ५३ म्हशींची निर्दयीपणे वाहतूक सुरू असल्याचे आढळून आले. त्यावेळी पोलिसांनी जागीच तीनही वाहने व म्हशी असा एकुण ३६ लाख ९० हजार रूपये किंमतीचा मुद्देमाल हस्तगत केला आहे. नशिराबाद पोलिसांची ही उल्लेखनीय कामगिरी असून त्यांनी मिळालेल्या गुप्त माहितीचा योग्य दिशेने तपास घेत ही कामगिरी केल्याने या वरून नशिराबाद पोलिसांची आपल्या कमाबाबतची कर्तव्यनिष्ठा दिसून येते.
याप्रकरणी पो.हे.कॉ अतुल महाजन यांनी दिलेल्या फिर्यादीवरून सायन खान कलीम खान (२८, रा. बलखड, जि. खरगोन, मध्यप्रदेश), साहीद खान सलीम खान (३५, रा. बालासमट, जि. खरगोन, मध्यप्रदेश), समीर शहा सिद्धीक शहा (२९, रा. देवास, इंदूर, मध्यप्रदेश) यांच्याविरुद्ध नशिराबाद पोलिस ठाण्यात गुन्हा दाखल करण्यात आला असून पुढील तपास सहायक पोलिस निरीक्षक रामेश्वर मोताळे यांच्या मार्गदर्शनाखाली सहायक फौजदार हरेष पाटील करीत आहेत.
