भुसावळातील गँगवार कारागृहापर्यंत पोहचले !
जळगाव / प्रतिनिधी/पोलीस दक्षता लाईव्ह:- भुसावळातील माजी नगरसेवक रवींद्र खरात यांच्या हत्याकांडातील सध्या जळगाव जेलमध्ये असलेल्या आरोपींमध्ये अंतर्गत वादातून एकाची हत्या करण्यात आल्याची खळबळजनक घटना घडली आहे.या घटनेने पोलीस प्रशासनावर प्रश्नचिन्ह निर्माण झाले आहे.
याबाबत सविस्तर वृत्तांत असे की, भुसावळचे माजी नगरसेवक तथा रिपाइंचे तत्कालीन जिल्हाध्यक्ष रवींद्र बाबूराव खरात ( वय ५५) यांची ७ ऑक्टोबर २०१९ रोजी भुसावळ शहरात अतिशय क्रूर पध्दतीत हत्या करण्यात आली होती. एका टोळक्याने त्यांच्यासह कुटुंबातील सदस्यांवर केलेल्या भयंकर हल्ल्यात रवींद्र खरात यांच्यासह एकूण पाच जणांचा मृत्यू झाल्याने परिसर हादरला होता. पूर्व वैमनस्यातून हे हत्याकांड झाल्याचे चौकशीत निष्पन्न झाले होते. या प्रकरणातील आरोपींना अटक करण्यात आली असून ते जळगाव कारागृहात आहेत. या प्रकरणातील एक आरोपी मोहसीन असगर खान याचे दुसऱ्या आरोपीशी काल दुपारी भांडण झाले. दुपारपासूनच या दोघांमध्ये धुसफुस सुरूच होती. या अनुषंगाने रात्री सुमारे दीड वाजेच्या सुमारास दुसर्‍या आरोपीने याने मोहसीन असगर खान ( वय ३४) याच्यावर हल्ला चढवत त्याला गंभीर जखमी केले.
दरम्यान, असगरला तातडीने जिल्हा रूग्णालयात दाखल करण्यात आले असता त्याला मृत घोषीत करण्यात आले.जळगाव कारागृह हे आधी देखील अनेक गैरकृत्यांमुळे कायम चर्चेत असतांना आता थेट जेलमधील कैद्याचा थेट खून झाल्यामुळे एकच खळबळ उडाली आहे. या प्रकरणी कारागृह प्रशासनाच्या कारभारावर पुन्हा प्रश्नचिन्ह निर्माण झाले आहे. कर्तव्यात कसूर करणार्‍यांवर कारवाई होण्याचे संकेत आहेत. शेवटचे वृत्त हाती आले तेव्हा मयत असगर याचा मृतदेह हा जिल्हा रूग्णालयात दाखल करण्यात आला होता.
तर पोलिसांनी जेलकडे धाव घेऊन आरोपीला ताब्यात घेत त्याची चौकशी सुरू केली आहे. या माध्यमातून भुसावळातील गँगवार हे जेलमध्ये देखील पोहचल्याचे दिसून आले आहे. दरम्यान या घटनेची सर्वत्र चर्चा सुरू आहे.
