चाळीसगाव/पोलीस दक्षता लाईव्ह टीम:- बुधवार ७ फेब्रुवारी रोजी दुपारच्या सुमारास माजी नगरसेवकावर अज्ञात पाच हल्लेखोरांनी गोळीबार करून जखमी केल्याची खळबळजनक घटना चाळीसगाव शहर पोलीस ठाण्याच्या हद्दीत घडली आहे. दरम्यान ही घटना घडल्यानंतर चाळीसगाव शहर पोलीस ठाण्याचे अधिकारी व कर्मचारी यांनी तत्काळ घटनास्थळ गाठले.
अशी घडली घटना..
सविस्तर वृत्त असे की, शहरातील देवरे हॉस्पिटल समोर बुधवारी ७ फेब्रुवारी रोजी चाळीसगाव शहरातील माजी नगरसेवक बाळू मोरे यांच्यावर गोळीबार करून जीवघेणा हल्ला केल्याचा खळबळजनक प्रकार दुपारच्या सुमारास घडला आहे. हा प्रकार तेथील सीसीटीव्हीत कैद झाला असून, त्यात एका कारमधून पाच जण उतरल्याचे दिसत आहे. सर्व हल्लेखोरांनी तोंडाला रूमाल बांधलेला होता. एकूण पाच जण हातात बंदुका घेवून गोळीबार करतांना दिसत आहे. या गोळीबारमध्ये माजी नगरसवेक बाळू मोरे यांच्या हाताला गंभीर दुखापत झाली असून, ते थोडक्यात बचावले आहे.
चाळीसगाव पोलीस अधिकारी व कर्मचऱ्यांची घटनास्थळी तातडीने धाव
ही घटना चाळीसगाव शहर पोलीस ठाण्याच्या हद्दीत झाल्याने पोलीस ठाण्याचे पोलीस निरीक्षक संदीप पाटील यांच्यासह पोलीस अधिकारी व कर्मचारी यांनी तातडीने घटनास्थळी धाव घेतली. हा गोळीबार कोणत्या कारणामुळे झाला हे अद्याप समोर आलेले नाही. याचे गंभीर दखल घेत चाळीसगाव पोलीसांकडून चौकशीला सुरूवात करण्यात आली आहे.
काही दिवसांपूर्वी चाळीसगावमध्ये पोलीस दलात कार्यरत असलेल्या शुभम अगोणे या तरूणाच्या खुनामुळे संपूर्ण चाळीसगाव हादरले होते. आणि आता थेट माजी नगरसेवकावरच गोळीबार झाल्यामुळे गुन्हेगारीने चाळीसगावात डोके वर काढल्याचे दिसून येत आहे.
