जळगाव | प्रतिनिधी |पोलीस दक्षता लाईव्ह :- शहरात बनावट नोटा चलनात आणण्याचा प्रयत्न उधळण्यात स्थानिक गुन्हे शाखेला यश आले असून, आठ हजार रुपयांच्या ५०० रुपयांच्या बनावट नोटांसह दोघा संशयितांना शुक्रवारी रात्री अटक करण्यात आली. या कारवाईत दुचाकीसह दोन मोबाईल असा एकूण ३६ हजार ५०० रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, अटक केलेल्यांची नावे सचिन दरबारसिंग राजपूत (३४, रा. रामेश्वर कॉलनी) आणि सचिन संजय गोसावी (२३, रा. वाघ नगर, जळगाव) अशी आहेत.गोपनीय माहितीच्या आधारे, शासकीय वैद्यकीय महाविद्यालयाच्या मुख्य गेटजवळ हे दोघे बनावट नोटा वापरण्याचा प्रयत्न करत असल्याची माहिती मिळाल्यावर स्थानिक गुन्हे शाखेच्या पथकाने रात्री १० वाजेच्या सुमारास सापळा रचून कारवाई केली.कारवाईदरम्यान, ५०० रुपयांच्या १६ बनावट नोटा (एकूण ८,००० रुपये), दोन मोबाईल आणि दुचाकी (एमएच १९ डीयू ७८०८) असा एकूण ३६ हजार ५०० रुपयांचा मुद्देमाल हस्तगत करण्यात आला.
या प्रकरणी हवालदार विजय पाटील यांच्या फिर्यादीवरून जिल्हापेठ पोलीस ठाण्यात दोन्ही आरोपींविरोधात गुन्हा दाखल करण्यात आला असून, पुढील तपास पोलीस उपनिरीक्षक गोपाल देशमुख करीत आहेत.
