जळगाव | मुख्य संपादक चंदन पाटील | पोलीस दक्षता लाईव्ह :- जळगाव जिल्ह्याच्या विकास प्रवासात आता एका नव्या प्रशासनिक अधिकाऱ्याची भर पडली आहे. ठाणे जिल्हा परिषदेचे मुख्य कार्यकारी अधिकारी म्हणून कार्यरत असलेले आयएएस अधिकारी रोहन बापूराव घुगे यांची जळगावच्या जिल्हाधिकारीपदी नियुक्ती करण्यात आली आहे. मंगळवारी संध्याकाळी राज्य शासनाने यासंदर्भातील आदेश जारी केले असून, ते लवकरच जिल्हाधिकारीपदाची सूत्रे हाती घेणार आहेत. सध्याचे जिल्हाधिकारी आयुष प्रसाद यांची बदली करण्यात आली असून त्यांच्या जागी रोहन घुगे जिल्ह्याची जबाबदारी स्वीकारतील. रोहन घुगे हे 2018 च्या आयएएस बॅचचे अधिकारी असून त्यांच्या कार्यक्षमतेचा ठसा त्यांनी अल्पावधीतच उमटविला आहे.
‘लंडन ते लातूर’ : रोहन घुगे यांचा प्रेरणादायी प्रवास…
मूळचे नांदेड जिल्ह्यातील रहिवासी असलेले रोहन बापूराव घुगे यांचे वडील भारतीय स्टेट बँकेत कार्यरत होते. मराठी माध्यमातून प्राथमिक शिक्षण पूर्ण केल्यानंतर त्यांनी पुणे विद्यापीठातून बी.टेक. पदवी संपादन केली. शिक्षणानंतर खासगी क्षेत्रात दाखल होत ते काही काळ लंडनमध्ये अभियंता म्हणून कार्यरत होते. परंतु परदेशात चांगले करिअर असतानाही त्यांना प्रशासन क्षेत्राची ओढ वाटू लागली. भारतात परत येत त्यांनी स्पर्धा परीक्षांची तयारी सुरू केली. 2015 साली असिस्टंट कमांडंट पदावर निवड झाल्यानंतर 2016 साली त्यांनी भारतीय वन सेवा (IFS) मध्ये यश संपादन केले. मात्र, त्यांचा ध्यास यावर थांबला नाही — पुढील वर्षी त्यांनी UPSC नागरी सेवा परीक्षा उत्तीर्ण करून IAS पद मिळविले.
नवोन्मेषी अधिकारी म्हणून घुगे यांची ओळख…
प्रशिक्षणानंतर रोहन घुगे यांनी वर्धा जिल्ह्यात कार्यरत राहून प्रशासनिक कारकिर्दीची सुरुवात केली. पुढे ठाणे जिल्हा परिषदेचे मुख्य कार्यकारी अधिकारी म्हणून त्यांनी अनेक नाविन्यपूर्ण उपक्रम राबविले. त्यापैकी ‘मिशन दीपस्तंभ’ हा उपक्रम विद्यार्थ्यांच्या गुणवत्ता विकासासाठी विशेष गाजला. या अभिनव प्रकल्पासाठी त्यांना राष्ट्रीय पातळीवरील सन्मान प्राप्त झाला. वर्धा जिल्हा कुपोषणमुक्त करण्यासाठी त्यांनी विशेष प्रयत्न केले, तर ठाण्यात त्यांनी ‘दिशा’ हा शालेय विद्यार्थ्यांसाठी प्रेरणादायी कार्यक्रम सुरू केला. राज्य सरकारच्या शंभर दिवसांच्या कृती कार्यक्रमात ठाणे जिल्ह्याने अग्रस्थान मिळविले, ज्यासाठी घुगे यांचा स्वतः मुख्यमंत्र्यांच्या हस्ते गौरव करण्यात आला.
जळगावसाठी नवे पर्व…
आता रोहन घुगे जळगाव जिल्ह्याचे नेतृत्व स्वीकारणार असून जिल्हा प्रशासनात नवा उत्साह आणि दिशा निर्माण होण्याची अपेक्षा व्यक्त केली जात आहे. त्यांच्या कार्यक्षमतेचा आणि दूरदृष्टीचा लाभ जिल्ह्याला निश्चितच मिळेल, असा विश्वास प्रशासन व जनतेमध्ये व्यक्त होत आहे.
