रावेर (सावदा)| प्रतिनिधी | पोलीस दक्षता लाईव्ह :- दि.२७ फेब्रुवारी हा दिवस राज्यभर “मराठी भाषा गौरव दिन” म्हणून अभिमानाने साजरा केला जातो. या दिवशी ज्येष्ठ साहित्यिक वि. वा. शिरवाडकर (कुसुमाग्रज) यांची जयंती असते. मराठी साहित्याला जागतिक कीर्ती प्राप्त करून देणाऱ्या या थोर साहित्यिकाच्या स्मरणातून मराठी भाषेचा सन्मान आणि गौरव व्यक्त केला जातो.
मराठी ही आपल्या मातृसंस्कृतीची, परंपरेची आणि सामाजिक मूल्यांची जपणूक करणारी समृद्ध व अभिजात भाषा आहे. संत साहित्यापासून आधुनिक विज्ञान-तंत्रज्ञानापर्यंत मराठी भाषेने प्रत्येक क्षेत्रात आपले वैशिष्ट्यपूर्ण स्थान निर्माण केले आहे. संत ज्ञानेश्वर, संत तुकाराम, महात्मा ज्योतिबा फुले आणि डॉ. बाबासाहेब आंबेडकर यांसारख्या महान व्यक्तींनी मराठीच्या माध्यमातून समाजप्रबोधनाची चळवळ उभी केली व समाजमन जागृत केले.विद्यार्थ्यांच्या सर्वांगीण जडणघडणीत मातृभाषेचे स्थान अत्यंत महत्त्वपूर्ण आहे. बालक जेव्हा आपल्या मातृभाषेतून शिक्षण घेतो, तेव्हा त्याची आकलनशक्ती, विचारक्षमता आणि अभिव्यक्ती अधिक प्रभावीपणे विकसित होते. मराठी माध्यमाच्या शाळा विद्यार्थ्यांना केवळ ज्ञान देत नाहीत, तर संस्कार, नैतिक मूल्ये आणि समाजाभिमुख दृष्टिकोनही देतात. मातृभाषेतून शिक्षण घेताना विद्यार्थी आत्मविश्वासाने प्रश्न विचारतो, आपले विचार स्पष्टपणे मांडतो आणि सृजनशीलतेला वाव देतो. त्यामुळे त्याची शैक्षणिक प्रगती सुदृढ पायावर उभी राहते.
जागतिक स्पर्धेच्या युगात विविध भाषांचे ज्ञान आवश्यक असले, तरी शिक्षणाचा भक्कम पाया मातृभाषेतच असावा, हे तितकेच अधोरेखित करणे गरजेचे आहे. मराठी भाषेच्या संवर्धनासाठी वाचन संस्कृती वृद्धिंगत करणे, शाळांमध्ये विविध भाषिक उपक्रम राबविणे आणि विद्यार्थ्यांना दर्जेदार साहित्याची ओळख करून देणे ही आपली सामूहिक जबाबदारी आहे.मराठी भाषा गौरव दिनानिमित्त सर्वांनी मराठीचा अभिमान बाळगून तिचा दैनंदिन व्यवहारात अधिकाधिक वापर करण्याचा संकल्प करावा. मराठी ही आपल्या अस्मितेची ओळख आहे. तिच्या जतन व संवर्धनातूनच समाजाचे भविष्य अधिक उज्ज्वल होईल, असा विश्वास व्यक्त केला जात आहे.
श्री.गणेश सुभाष बाविस्कर
मुख्याध्यापक, नूतन प्राथमिक विद्यामंदिर, चिनावल
ता. रावेर, जि. जळगाव.
