मुक्ताईनगर पोलिसांचा धडाकेबाज तपास..! आरोपींना ४ दिवसांची पोलीस कोठडी..
मुक्ताईनगर | प्रतिनिधी | पोलीस दक्षता लाईव्ह :- मुक्ताईनगर शहरात झालेल्या घरफोडी व दुचाकी चोरी प्रकरणाचा तपास स्थानिक पोलिसांनी अवघ्या काही दिवसांत उलगडत तिघा संशयितांना जेरबंद केले आहे. पोलिसांनी आरोपींकडून चोरीस गेलेली दोन दुचाकी वाहने, ९४ हजार ५०० रुपयांची सोन्याची दागिने व १० हजार रुपयांची रोख रक्कम असा एकूण २ लाख ४२ हजार ५०० रुपयांचा मुद्देमाल हस्तगत केला आहे. आरोपींना न्यायालयात हजर केले असता त्यांना ४ दिवसांची पोलीस कोठडी सुनवण्यात आली आहे.
गेल्या ७ व ८ ऑक्टोबर रोजी मुक्ताईनगर शहरातील डॉ. आंबेडकर नगर परिसरात तसेच पंचायत समिती जवळ घरफोडीची घटना घडली होती. तसेच घोडसगाव व मुक्ताईनगर येथून दोन मोटारसायकली चोरीस गेल्या होत्या. या प्रकरणी पोलिसांनी गुप्त माहितीच्या आधारे संशयितांचा शोध घेत बुलढाणा जिल्ह्यातील खामगाव तालुक्यातील अंबिकापुर येथे धाड टाकून आरोपींना ताब्यात घेतले. अटक करण्यात आलेले संशयित आरोपी प्रदीप हिवराळे (वय ३० वर्षे), अतुल हिवराळे (वय ३० वर्षे) व रवी हिवराळे (वय ४० वर्षे, सर्व रा. अंबिकापुर, ता. खामगाव, जि. बुलढाणा) अशी आहेत. आरोपींनी गुन्ह्यात वापरलेले डिझायर कार हे चारचाकी वाहन देखील पोलिसांनी जप्त केले आहे.
या कारवाईत पोलीस अधीक्षक डॉ. महेश्वर रेड्डी यांच्या मार्गदर्शनाखाली पोलीस निरीक्षक आशिष अडसूळ, पोलीस उपनिरीक्षक नयन पाटील, हवालदार महेंद्र सुरवाडे, पोलीस हेड कॉन्स्टेबल अजय खंडेराव, पोलीस कॉन्स्टेबल रवींद्र धनगर, अमोल जाधव व अक्षय वाडे यांच्या पथकान े विशेष भूमिका बजावली.
दरम्यान, संशयित आरोपींना न्यायालयात हजर केले असता ४ दिवसांची पोलीस कोठडी सुनवण्यात आली असून पुढील तपास पोलिसांकडून सुरू आहे.
