नशिराबाद | प्रतिनिधी | पोलीस दक्षता लाईव्ह :- नशिराबाद नगर परिषदेने सन २०२६-२७ या आर्थिक वर्षासाठी १५० कोटी ७८ लाख ५० हजार रुपयांचा भांडवली शिलकी अर्थसंकल्प सर्वसाधारण सभेत सादर करत विकासाला स्पष्ट दिशा दिली आहे. मुख्याधिकारी रवींद्र सोनवणे यांनी सभागृहासमोर अर्थसंकल्प मांडताना शहराच्या दीर्घकालीन गरजा लक्षात घेऊन नियोजन करण्यात आल्याचे स्पष्ट केले.
अर्थसंकल्पीय मांडणीच्या वेळी लोकनियुक्त नगराध्यक्ष योगेश पाटील, उपनगराध्यक्ष तथा शिक्षण, पर्यावरण व आपत्ती व्यवस्थापन सभापती पंकज महाजन, अर्थ व नियोजन सभापती मनोज पाटील, महिला व बालकल्याण सभापती श्रीमती मन्यार कमरुनिसा सय्यद बिस्मिल्ला, उपसभापती श्रीमती भारताबाई धनगर, सार्वजनिक आरोग्य, स्वच्छता व दिवाबत्ती सभापती चेतन बऱ्हाटे यांच्यासह नगरसेवक-नगरसेविका मोठ्या संख्येने उपस्थित होते.
पायाभूत सुविधांवर ठोस भर.
शहरातील मूलभूत सेवांची उभारणी आणि दर्जावाढ हा अर्थसंकल्पाचा केंद्रबिंदू ठरला आहे. नागरिकांना शाश्वत व नियमित पाणीपुरवठा सुनिश्चित करण्यासाठी विद्यमान यंत्रणांचे सक्षमीकरण, नवीन जलस्रोतांचा विकास आणि वितरण व्यवस्थेतील सुधारणा यासाठी भरीव निधी राखीव ठेवण्यात आला आहे. वाढत्या लोकसंख्येच्या पार्श्वभूमीवर सांडपाणी व्यवस्थापन आणि गटार योजनेच्या विस्तारासाठी स्वतंत्र तरतूद करण्यात आली असून, स्वच्छता व्यवस्थेला बळकटी देण्याचा मानस व्यक्त करण्यात आला.
नदी पुनरुज्जीवनावर लक्ष.
शहरातील नदीपात्र संवर्धन, गाळ काढणी, काठ संरक्षण आणि पर्यावरणपूरक उपाययोजनांसाठी विशेष निधी प्रस्तावित करण्यात आला आहे. पर्यावरणीय संतुलन राखत शहराचा शाश्वत विकास साधण्याचा प्रयत्न या माध्यमातून होणार असल्याचे प्रशासनाने स्पष्ट केले.
सामाजिक बांधिलकीची जाणीव.
नगर परिषद हद्दीत मृत व्यक्ती तसेच बेवारस प्रेतांच्या अंत्यसंस्कार व दफनविधीसाठी लागणारा संपूर्ण खर्च नगर परिषदेच्या वतीने उचलण्याचा निर्णय अर्थसंकल्पात अधोरेखित करण्यात आला आहे. यासाठी स्वतंत्र तरतूद करण्यात आली असून, गरजू कुटुंबांवरील आर्थिक ओझे कमी करण्याचा हेतू असल्याचे सांगण्यात आले.
नियोजन प्रक्रियेत अधिकाऱ्यांचा सहभाग.
अर्थसंकल्पीय तयारीदरम्यान लेखापाल दौलत गुट्टे, लेखापरीक्षक मनोज गोरे, कार्यालय अधीक्षक आझाद पटेल तसेच संतोष रगडे यांनी समन्वयाने कामकाज केले. महसूल वाढ, खर्चाचे प्राधान्यक्रम आणि विकासकामांचे टप्पे यांचा सविस्तर आढावा घेऊन प्रस्ताव अंतिम करण्यात आल्याची माहिती देण्यात आली.
सभागृहात व्यक्त झालेल्या भावना लक्षात घेता, प्रस्तुत अर्थसंकल्प हा विकासाभिमुख, पारदर्शक आणि नागरिककेंद्री असल्याचे मत सर्वपक्षीय सदस्यांनी नोंदविले.नियोजनबद्ध अंमलबजावणी झाल्यास शहराच्या सर्वांगीण प्रगतीस या अर्थसंकल्पातून गती मिळेल, असा विश्वास व्यक्त करण्यात आला.
