जळगाव | प्रतिनिधी | पोलिस दक्षता लाईव्ह :- नशिराबाद गावाचे आता झपाट्याने शहरात रूपांतर होत आहे. विमानतळ, राष्ट्रीय महामार्ग या दळणवळणाच्या सुविधेमुळे शहराचा मोठा विकास नजिकच्या काळात होईल. चार कोटी रुपयांच्या निधीतून बांधलेली अत्यंत सुंदर नवी नगरपरिषद ही या शहराच्या विकासाचा मोठा आधार ठरेल असे सांगून शहरातील 14 कोटी रुपये कामाचे लोकार्पण आणि 8 कोटीच्या नव्या कामाचे भूमीपूजन झाले आहे. यामुळे शहराच्या पायाभूत सुविधा उत्तम होण्यासाठी मदत होणार आहे. नशिराबादकरांच्या मागणीनुसार येथे छत्रपती शिवाजी महाराजांचा भव्य पुतळा उभारणार असल्याचे पालकमंत्री गुलाबराव पाटील यांनी केले. नशिराबाद नगरपरिषद नूतन इमारतीच्या लोकार्पण प्रसंगी ते बोलत होते.
पालकमंत्री पाटील पुढे म्हणाले की, पिण्याचे पाण्यासाठी आणि पथदिव्यांसाठी आता मंजूर केलेल्या 110 के.व्हीच्या सोलार प्रकल्पातून 12 महिन्यातील 10 महिने शून्य आकार पडणार आहे. हा खूप मोठा खर्च नगरपरिषदेचा वाचणार आहे. हा पैसा इतर विकासाच्या कामासाठी वापरला जाईल केवळ अठरा महिन्यात अत्यंत गुणवत्तापूर्ण नगर परिषद बांधली आहे. या इमारतीच्यावर एक मोठे सभागृह बांधण्यासाठी येणाऱ्या काळात निधी देऊ.. शहरासाठी भूमीगत गटारी, लागतील तिथे पुल दिले आहेत. त्यामुळे शहराच्या विकासाला गती देण्यासाठी सर्व गोष्टी पूरक आहेत.आता सर्वांनी शहराच्या प्रगतीसाठी काम करा. जिथे आवश्यकता आहे, तिथे आपण असल्याचे सांगून 60 पूर्णांक 57 कोटीच्या भुयारी गटार योजनेला सुरुवात झालेली आहे. वाघुर नदीवरून फिल्टरसह शहराला पाणीपुरवठा योजनेचे काम देखील प्रगती पथावर असल्याचे पालकमंत्री यांनी नशिराबादकरांना आश्वासीत केले.
जिल्हाधिकारी आयुष प्रसाद यांनी शहराला शोभेल अशी नगरपरिषद इमारत झाल्याचे सांगून नशिराबाद जळगाव आणि भुसावळ या दोन मोठ्या शहराच्या मध्यभागी असल्यामुळे विकासाचे नवे केंद्र बनेल. शहराच्या विकासासाठी लागणाऱ्या सर्व मूलभूत सुविधा उभारल्या जात असल्यानं विकासाला आणखी वेग येणार असल्याचे सांगितले. नगरपरिषदेचे मुख्याधिकारी रवींद्र सोनवणे यांनी आपल्या प्रास्ताविकात शहरात झालेल्या कामाची आणि होऊ घातलेल्या कामाची माहिती दिली. सूत्रसंचालन राजेंद्र पाचपांडे यांनी केले .
याप्रसंगी जिल्हाधिकारी आयुष प्रसाद, माजी महापौर तथा शिवसेनेचे जिल्हाप्रमुख विष्णु भंगाळे, जि.प.चे माजी उपाध्यक्ष लालचंद पाटील, माजी सरपंच विकास पाटील, माजी सरपंच पंकज महाजन, माजी उपसरपंच किर्तीकांत चौबे ,तालुका प्रमुख शिवराज पाटील, शहर प्रमुख विकास धनगर, नगर परिषदेचे मुख्याधिकारी रवींद्र सोनवणे, प्रशासकीय अधिकारी आझाद पटेल ,पाणीपुरवठा अभियंता अतुल चौधरी ,बांधकाम अभियंता विजय तोषनिवाल , लेखापरीक्षक मनोज गोरे ,लेखाधिकारी दौलत गुट्टे, नगररचना सहायक गायत्री पाटील, संगणक अभियंता सचिन पलाडे, कनिष्ठ अभियंता शुभम जाधव, कर अधिकारी राहुल धनवडे, सार्वजनिक बांधकामचे शाखा अभियंता रायसिंग़, चेअरमन योगेश पाटील, बापू बोढरे, भूषण बऱ्हाटे, असलंम सर, रमेश पाटील, कंत्राटदार नितीन बऱ्हाटे, जितेंद्र महाजन ,सुकलाल कोळी, शालिक कोळी, शहरातील मान्यवर नागरिक यावेळी उपस्थित होते.
यावेळी मंत्री गुलाबराव पाटील आणि जिल्हाधिकारी आयुष प्रसाद यांनी नगरपरिषदेच्या नवीन इमारतीतील अनेक दालनांची पाहणी करून समाधान व्यक्त केले. नवीन नगरपरिषद योजना अंतर्गत ४ कोटी रुपयांची नवीन फर्निचरसह प्रशासकीय इमारत बांधकामाचे लोकार्पण झाले. हायवेला लागून शहरातील मुख्य रस्त्यावर उभारलेल्या भव्यअशा प्रवेशद्वाराचे लोकार्पण देखील करण्यात आले.
तसेच विशेष रस्ता अनुदान योजना 2023 – 24 अंतर्गत दत्त नगर, लक्ष्मी नगर, साई समर्थनगर, नाज नगर, प्रभाग क्र. १ ते १० या भागांसह शहरातील अनेक वस्तीमध्ये रस्त्यांचे कॉक्रिटीकरण, पेव्हरब्लॉक बसविणे आणि गटारी बांधकामाची कामे एकूण ४३७.११ लक्ष रुपयांच्या खर्चाची कामांचे लोकार्पण करण्यात आले.
नशिराबाद परिसरात एकूण ८१० लक्ष रुपयांच्या विकासकामांचा शुभारंभ होत आहे. जिल्हा नियोजन समिती अंतर्गत ३६० लक्ष रुपयांत महिला बचत गट सक्षमीकरणासाठी व्यापारी संकुल, नवीन प्रशासकीय इमारतीपासून नॅशनल हायवेपर्यंत रस्त्याचे डांबरीकरण तसेच ११० केव्ही सौर ऊर्जा प्रकल्प उभारण्यात येणार आहे. तर विशिष्ट नागरी सेवा योजनेतून ४५० लक्ष रुपयांत दत्तनगर – मुक्तेश्वर नगर रस्ता काँक्रीटीकरण, पेठ – भवानीनगर जोडणारा पूल आणि लेवा पाटील समाजाकरिता सामाजिक सभागृह उभारले जाणार आहे.
