जळगाव | प्रतिनिधी | पोलीस दक्षता लाईव्ह :- स्थानिक गुन्हे शाखा (एलसीबी) जळगावने फैजपूर उपविभागात धडक कारवाई करत अवैधरित्या अंमली पदार्थ गांजा विक्रीसाठी साठवून ठेवलेल्या दोन इसमांना रंगेहाथ अटक केली आहे. या कारवाईत तब्बल ९ किलो ७१७ ग्रॅम गांजा, किंमत ₹१,९४,३४० इतका मुद्देमाल हस्तगत करण्यात आला आहे.
दि. २८ ऑगस्ट रोजी गणेशोत्सवाच्या पार्श्वभूमीवर फैजपूर उपविभागात गस्त घालत असताना पथकाला गुप्त माहिती मिळाली की, न्हावी शिवारातील एका शेतातील पत्र्याच्या घरात दोन इसम अवैधरित्या गांजा साठवून विक्रीसाठी ठेवले आहेत. वरिष्ठ पोलीस निरीक्षक संदीप पाटील यांच्या मार्गदर्शनाखाली फैजपूर पोलीस ठाणे, यावल पोलीस ठाणे व एलसीबीच्या संयुक्त पथकाने छापा टाकून ही कारवाई केली.
छाप्यात आरोपी (१) रगन सुकराम वारेला (वय ३२, रा. महादेव शिरवेल, ता. भगवानपुरा, जि. खरगोन, मध्यप्रदेश, ह.मु. न्हावी) व (२) अझरुद्दीन अब्दुल वाहिद कुरेशी (वय २७, रा. सिध्दवलपुर, एलहंका, बेंगलुरु, कर्नाटक) यांना अटक करण्यात आली. त्यांच्या ताब्यातून गांजा जप्त करण्यात आला असून फैजपूर पोलीस ठाण्यात एनडीपीएस कायद्यान्वये गुन्हा दाखल करण्यात आला आहे.
ही कारवाई मा. पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी अनिल बडगुजर यांच्या मार्गदर्शनाखाली करण्यात आली. यामध्ये यावल पोलीस ठाण्याचे पोनि. रंगनाथ धारबळे, फैजपूर पोलीस ठाण्याचे प्रभारी सपोनि. रामेश्वर मोताळे तसेच एलसीबीचे पोउपनि. शरद बागल, निरज बोकील, विनोद गाभणे यांच्यासह पथकातील अधिकारी व अंमलदारांचा सक्रिय सहभाग होता.
