भुसावळ/पोलीस दक्षता लाईव्ह टीम:– दि.१६ फेब्रुवारी शुक्रवार रोजी दुपारी १ वाजेच्या सुमारास २७ वर्षीय तरूणाला अज्ञात कारणावरून शेतात बोलावून बेदम मारहाण करून खून केल्याचा धक्कादायक प्रकार भुसावळ तालुक्यातील गोजोरा येथे समोर आला आहे. याप्रकरणी भुसावळ तालुका पोलीस ठाण्यात गुन्हा दाखल करण्यात आला आहे. विनोद गंभीर कोळी (वय २७, रा. गोजोरा, ता.भुसावळ) असे मयत तरूणाचे नाव आहे.
सविस्तर वृत्त असे की, मयत विनोद कोळी हा तरूण हा शेतीकाम करून आपल्या कुटुंबाचा उदरनिर्वाह करीत होता.तसेच आई, वडील आणि दोन भावांसह गोजोरा येथे वास्तव्याला होता. .मिळालेल्या माहितीनुसार दोन दिवसांपूर्वी संशयित आरोपी जितू प्रभाकर डोळे, समा प्रभाकर डोळे यांनी विनोदला मारहाण केली होती. काल शुक्रवारी १६ फेब्रुवारी रोजी विनोदला एकटाच असल्याचे पाहून त्याला संशयित श्रावण सुपडू डोळे यांच्या मुलाने शेतात बोलावून घेतले.
शेतात संशयित श्रावण डोळे, जितू डोळे, समा डोळे यांच्यासह काही संशयितांनी विनोदला बेदम मारहाण केली. त्यात तो गंभीर जखमी झाला. त्यामुळे त्याला सुरूवातीला भुसावळ ट्रॉमा सेंटर येथे दाखल केले. त्याची प्रकृती अधिक खालावल्याने त्याला तातडीने जळगाव येथील शासकीय वैद्यकीय महाविद्यालय व रुग्णालय येथे हलविण्यात आले. जळगाव येथील शासकीय रुग्णालयात दाखल केले असता वैद्यकीय अधिकारी डॉ. सचिन पाटील यांनी तपासणी अंती मयत घोषित केले.
भुसावळ तालुका पोलीस स्टेशन कर्मचारी यांना माहिती मिळताच त्यांनी घटनास्थळी धाव घेतली. तर पोलीस अधिकारी अमोल पवार यांच्यासह अधिकाऱ्यांनी जळगाव रुग्णालयात येत कुटुंबियांकडून याप्रकरणी माहिती जाणून घेतली. याबाबत भुसावळ तालुका पोलीस स्टेशनला खुनाचा गुन्हा दाखल करण्यात आला आहे.
