अमळनेर/प्रतिनिधी/पोलीस दक्षता लाईव्ह:- अमळनेर तालुक्यातील कळमसरे येथे दि.31 ऑगस्ट रोजी अज्ञात चोरट्याने ट्रॅक्टर व रोटाव्हेटर चोरून नेल्याची घटना घडली होती. या प्रकरणी मारवड पोलीस स्टेशनच्या कर्मचाऱ्यांनी संशयित आरोपीला ट्रॅक्टर व रोटाव्हेटर चोरी प्रकरणी अटक केली. संशयित आरोपीस अमळनेर न्यायालयात हजर केले असता त्याला दोन दिवस पोलीस कोठडी सुनावली आहे.
मिळालेल्या माहितीनुसार, तालुक्यातील कळमसरे गावात ट्रॅक्टर व रोटोव्हेटर अज्ञात चोरट्याने चोरुन नेल्याची घटना दि.31 ऑगस्ट रोजी घडली होती. या प्रकरणी मारवड पोलिसांच्या पथकाने तपास करत संशयित आरोपी तुषार शालिग्राम कोळी (वय २८) रा. म्हळसर ता. शिंदखेडा याला अटक केली आहे. तालुक्यातील कळमसरे येथे राहणारे शेतकरी हेमंत काशिनाथ चौधरी यांनी दिनांक 31 ऑगस्ट रोजी सायंकाळी आपले स्वराज कंपनीचे ट्रॅक्टर व रोटाव्हेटर गावातीलच रवींद्र कोळी यांच्या घरासमोर लावले होते. दुसऱ्या दिवशी दि.01 सप्टेंबर रोजी सकाळी सात वाजता सदर ट्रॅक्टर लावलेल्या जागी दिसून आले नाही. परिसरात सर्वत्र शोध घेतला असता ट्रॅक्टर व रोटोव्हेटर मिळून आले नाही. सदर ट्रॅक्टरची चोरी झाल्याची त्यांना खात्री झाल्याने हेमंत चौधरी यांनी ट्रॅक्टर व रोटोव्हेटर अंदाजे किंमत 4 लाख 35 हजार रुपये किमतीचे चोरुन नेल्याप्रकरणी अज्ञात चोरट्याविरुद्ध मारवड पोलिसात तक्रार दाखल केली आहे.पोलीस पुढील तपास करीत आहे.
याप्रकरणी सपोनि शीतलकुमार नाईक यांच्या मार्गदर्शनाखाली तपासी अंमलदार पोना सुनील तेली यांनी तपास केला. संशयित आरोपी शिरपूर येथे ट्रॅक्टर विक्री करणार असल्याची माहिती मिळाल्याने पोना सुनील तेली, पोकॉ उज्वल पाटील, हेकॉ सचिन निकम यांच्या पथकाने शिरपूर येथे संशयित आरोपीस ताब्यात घेतले. ट्रॅक्टरही ताब्यात घेतले आहे.
