जळगाव | प्रतिनिधी | पोलीस दक्षता लाईव्ह :- जळगाव जिल्ह्यात अवैधरीत्या गावठी पिस्टल बाळगून दहशत माजविणाऱ्या दोन इसमांना स्थानिक गुन्हे शाखेच्या पथकाने बेड्या ठोकल्या आहेत. आरोपींकडून गावठी पिस्तूल, दोन जिवंत काडतुसे, पल्सर मोटारसायकल आणि दोन मोबाईल असा एकूण १ लाख २९ हजार रुपये किमतीचा मुद्देमाल जप्त करण्यात आला आहे.
ही कारवाई मा. डॉ. महेश्वर रेड्डी, पोलीस अधीक्षक, जळगाव यांच्या आदेशानुसार व मा. श्री अशोक नखाते, अपर पोलीस अधीक्षक, जळगाव तसेच मा. श्री राहुल गायकवाड, वरिष्ठ पोलीस निरीक्षक, स्थानिक गुन्हे शाखा यांच्या मार्गदर्शनाखाली करण्यात आली.
गुप्त माहितीवरून सापळा
दिनांक ४ मे २०२५ रोजी स्थानिक गुन्हे शाखेला गुप्त बातमीदारामार्फत माहिती मिळाली की, दोन संशयित इसम गावठी कट्टासह वरणगाव शहरातील फुलगाव ब्रिज परिसरात दहशत माजविण्याच्या उद्देशाने येणार आहेत. ही माहिती मिळताच वरिष्ठ पोलीस निरीक्षक राहुल गायकवाड यांनी तात्काळ पथक तयार करून सापळा रचला. पथकाने दिलेल्या माहितीनुसार काळ्या-लाल रंगाची पल्सर मोटारसायकल (क्र. MP-68 ZC 3357) अडवली असता त्यावर दोन संशयित आढळले. चौकशीअंती त्यांची नावे चरणसिंग उखा चव्हाण (३६, रा. चौडी, ता. भाणपुर, म.प्र.) पंकज रतनसिंग चव्हाण (२५, रा. मोरझिरा, ता. मुक्ताईनगर, जि. जळगाव) अशी नोंद झाली.
मुद्देमाल जप्त
अंगझडती घेतली असता आरोपींकडे एक गावठी पिस्तूल, दोन जिवंत काडतुसे, मोटारसायकल व दोन मोबाईल असा मोठा मुद्देमाल आढळून आला. सदरहू शस्त्रे आणि साहित्य परवानगीशिवाय बाळगले असल्याने आरोपींविरुद्ध वरणगाव पोलीस स्टेशनला गुन्हा दाखल करण्यात आला आहे.
धाडसी पथकाची कामगिरी
ही यशस्वी कारवाई उपनिरीक्षक सोपान गोरे यांच्या नेतृत्वाखाली पोलीस हवालदार यशवंत टहाकळे, प्रेमचंद सपकाळे, प्रितम पाटील, श्रीकृष्ण देशमुख, बबन पाटील, रविंद्र चौधरी, सचिन घुगे व चापोह भरत पाटील (सर्व स्थानिक गुन्हे शाखा, जळगाव) यांनी केली.
