जळगाव | प्रतिनिधी | पोलीस दक्षता लाईव्ह :- शहरातील एमआयडीसी औद्योगिक वसाहतीतील ई-सेक्टरमध्ये असलेल्या श्री आनंद बॅटरी कंपनीतून सुमारे ९७ हजार रुपयांचे कच्चे साहित्य चोरीला गेल्याची घटना शुक्रवारी (दि. १ ऑगस्ट) सकाळी ८.३० वाजता उघडकीस आली. या प्रकरणी अज्ञात चोरट्यांविरोधात एमआयडीसी पोलीस ठाण्यात गुन्हा दाखल करण्यात आला आहे.
या घटनेबाबत अधिक माहिती अशी की, गणपती नगर येथील रहिवासी लखन वासुदेव बधानी (वय ४९) यांची ई-सेक्टरमध्ये श्री आनंद बॅटरी नावाची फॅक्टरी आहे. या फॅक्टरीत बॅटरी तयार करण्यासाठी लागणारे कच्चे साहित्य मोठ्या प्रमाणावर ठेवण्यात आलेले असते. दरम्यान, ३१ जुलै ते १ ऑगस्ट दरम्यानच्या कालावधीत अज्ञात चोरट्यांनी कंपनीत घुसून सुमारे ९७ हजार रुपये किमतीचे साहित्य चोरून नेले.
ही घटना शुक्रवारी सकाळी कामगारांनी कामावर आल्यानंतर उघडकीस आली. याबाबत उद्योजक लखन बधानी यांनी तातडीने एमआयडीसी पोलीस ठाण्यात धाव घेत तक्रार दाखल केली. त्यांच्या तक्रारीवरून रात्री आठच्या सुमारास अज्ञात चोरट्यांविरोधात गुन्हा दाखल करण्यात आला आहे.या चोरीप्रकरणाचा तपास पोलीस हेड कॉन्स्टेबल प्रसाद लाडवंजारी हे करीत आहेत.
