जेष्ठ अभिनेत्री सुलोचना दीदी काळाच्या पडद्याआड

मुंबई/प्रतिनिधी/पोलीस दक्षता लाईव्ह:- मुंबई पद्मश्री तसंच महाराष्ट्र भूषण पुरस्कारानं सन्मानित मराठी सिनेसृष्टीतील ज्येष्ठ अभिनेत्री सुलोचना लाटकर यांचं आज निधन झालं. वयाच्या ९४ व्या वर्षी दादर येथील खासगी रुग्णालयात त्यांनी अखेरचा श्वास घेतला. गेल्या काही महिन्यांपासून सुलोचना श्वसनाशी संबंधित संसर्गानं आजारी होत्या. त्यांच्यावर उपचार सुरू होते. अखेर आज उपचारांदरम्यान त्यांची प्राणज्योत मालवली.आज सायंकाळी सहा वाजून ५ मिनिटांनी सुलोचना दीदींचं निधन झालं. उद्या सायंकाळी ५ वाजता दादरच्या स्मशानभूमीत त्यांच्यावर अंत्यसंस्कार होणार आहेत. सुलोचना यांच्या निधनानं मराठी सिनेसृष्टीवर शोककळा पसरली आहे.सुलोचनादीदींच्या फिल्मी करिअरबद्दल बोलायचं झालं तर हिंदी आणि मराठी चित्रपटसृष्टीतील ज्येष्ठ अभिनेत्री म्हणून ओळखल्या जायच्या. सुलोचना यांचा जन्म ३० जुलै १९२८ रोजी झाला. १९४३ यावर्षी त्यांनी अभिनयाच्या विश्वात पदार्पण केलं होतं. सुलोचना यांनी मराठी आणि हिंदी सिनेमांत चरित्र अभिनेत्री म्हणून काम केलं होतं.अभिनयाच्या क्षेत्रात सुलोचना यांना भालजी पेंढारकर यांनी मार्गदर्शन केलं होतं. त्यांच्या तालमीत सुलोचनादीदी तयार झाल्या होत्या. दीदींनी आपल्या सोज्वळ दिसण्यानं आणि सहजसुंदर अभिनयानं प्रेक्षकांच्या मनात एक वेगळं स्थान निर्माण केलं होतं.प्रेक्षकांच्या मनात सुलोचनादीदी म्हणजे सोज्वळ, शांत आई अशी प्रतिमा त्यांनी निर्माण केली होती. सिनेमांमध्ये त्यांनी घरंदाज भूमिका साकारल्या होत्या. सुलोचनादीदींनी २५०हून अधिक मराठी तसच हिंदी सिनेमांत आपल्या अभियानाची छाप पाडली. वहिनीच्या बांगड्या, मीठ भाकर, धाकटी जाऊ यांसारखे त्यांचे अनेक सिनेमे गाजले.