मोहगन बुद्रूक–अहिरवाडी परिसरात केंद्रबिंदू; जीवित व वित्तहानी नसल्याची प्राथमिक माहिती
रावेर | प्रतिनिधी | पोलीस दक्षता लाईव्ह :- जळगाव जिल्ह्यातील रावेर तालुक्यात मंगळवारी सकाळी भूकंपाचा सौम्य धक्का जाणवल्याने काही काळ नागरिकांमध्ये खळबळ उडाली. राष्ट्रीय भूकंपशास्त्र केंद्राच्या नोंदीनुसार सकाळी ७ वाजून ५७ मिनिटांनी ३.३ रिश्टर स्केल तीव्रतेचा भूकंप नोंदविण्यात आला. या भूकंपाचा केंद्रबिंदू जमिनीखाली सुमारे ५ ते १० किलोमीटर खोलीवर मोहगन बुद्रूक व अहिरवाडी परिसरात असल्याचे सांगण्यात आले आहे.सकाळच्या वेळी अचानक जमिनीला हादरा जाणवल्याने काही नागरिकांमध्ये घबराट निर्माण झाली. घरातील वस्तूंना किंचित कंपन जाणवल्याचे नागरिकांनी सांगितले. तालुक्यातील काही गावांमध्ये भूकंपाचे धक्के जाणवल्याची माहिती मिळाली, तर काही भागांतील नागरिकांना त्याची जाणीव झाली नाही. भूकंपाची तीव्रता कमी असल्याने त्याचा व्यापक परिणाम झालेला नाही.
प्रशासनाकडून परिस्थितीचा आढावा
भूकंपाची माहिती मिळताच रावेर तहसील प्रशासनाने तातडीने यंत्रणा सक्रिय करून तालुक्यातील परिस्थितीचा आढावा घेण्यास सुरुवात केली. विविध गावांमधील अधिकारी, मंडळ अधिकारी तसेच स्थानिक यंत्रणांकडून माहिती घेण्यात आली.प्रशासनाच्या प्राथमिक माहितीनुसार, आतापर्यंत घर कोसळणे, भिंतींना तडे जाणे, इमारतींचे नुकसान किंवा अन्य वित्तहानी झाल्याचे निदर्शनास आलेले नाही. तसेच कोणतीही जीवितहानी झाल्याचे वृत्त नाही. त्यामुळे नागरिकांना दिलासा मिळाला आहे.
अफवांवर विश्वास न ठेवण्याचे आवाहन
रावेरचे तहसीलदार संजय तायडे यांनी भूकंपाच्या घटनेला दुजोरा देत नागरिकांनी घाबरून जाऊ नये, असे आवाहन केले आहे. भूकंपाची तीव्रता कमी असून प्रशासनाकडून परिस्थितीवर लक्ष ठेवण्यात येत असल्याचे त्यांनी स्पष्ट केले.भूकंपाच्या पार्श्वभूमीवर नागरिकांनी अप्रमाणित संदेश अथवा अफवांवर विश्वास न ठेवता प्रशासन आणि अधिकृत यंत्रणांकडून मिळणाऱ्या माहितीलाच प्राधान्य द्यावे, असे आवाहन करण्यात आले आहे. कुठेही भूकंपामुळे नुकसान झाल्याचे आढळल्यास त्याची माहिती तातडीने प्रशासनाला द्यावी, अशा सूचनाही देण्यात आल्या आहेत.
दरम्यान, ३.३ रिश्टर स्केलचा भूकंप हा सौम्य स्वरूपाचा धक्का मानला जात असून सध्या रावेर तालुक्यात परिस्थिती सामान्य आहे. गावपातळीवरील यंत्रणांशी संपर्क ठेवून प्रशासनाकडून परिस्थितीवर लक्ष ठेवण्यात येत आहे.
