शेतकऱ्यांचा वीजपुरवठा सुरळीत ठेवण्यासाठी उपाययोजना; तार चोरी करणाऱ्यांवर कठोर कारवाईचा निर्धार
नशिराबाद | प्रतिनिधी | पोलीस दक्षता लाईव्ह :- दुष्काळाच्या पार्श्वभूमीवर शेतकऱ्यांना सुरळीत व अखंडित वीजपुरवठा मिळावा, तसेच वीजवाहिनीवरील तार चोरीमुळे शेतीपंपांचा वीजपुरवठा खंडित होऊन शेतकऱ्यांचे नुकसान होऊ नये, यासाठी महावितरण व पोलीस प्रशासनाने संयुक्तपणे उपाययोजना करण्याचा निर्णय घेतला आहे. नशिराबाद परिसरातील शेतीपंप ग्राहकांना वीजपुरवठा करणाऱ्या लघुदाब वाहिनीवरील ॲल्युमिनियम तारांची रात्रीच्या वेळी वारंवार चोरी होत असल्याच्या पार्श्वभूमीवर पोलीस प्रशासन व महावितरणची संयुक्त बैठक घेण्यात आली.नशिराबाद शहर कक्षाचे सहाय्यक अभियंता पवन सुधाकर वाघुळदे आणि नशिराबाद पोलीस ठाण्याच्या सहाय्यक पोलीस निरीक्षक योगिता नारखेडे यांच्या उपस्थितीत महावितरणचे अधिकारी-कर्मचारी तसेच पोलीस प्रशासनाची बैठक झाली. यावेळी वीजवाहिनीवरील तार चोरीच्या घटनांना आळा घालणे, शेतकऱ्यांचा वीजपुरवठा सुरळीत ठेवणे आणि विद्युत यंत्रणेचे संरक्षण करण्यासाठी आवश्यक उपाययोजनांवर सविस्तर चर्चा करण्यात आली.दुष्काळी परिस्थितीत शेतकऱ्यांसमोर आधीच अनेक अडचणी निर्माण झाल्या आहेत. अशा परिस्थितीत शेतीपंपांना वीजपुरवठा करणाऱ्या वाहिनीवरील तार चोरीला गेल्यास संबंधित भागातील वीजपुरवठा खंडित होतो. त्यामुळे पिकांना वेळेवर पाणी देणे शक्य होत नसल्याने शेतीपिकांचे नुकसान होण्याबरोबरच शेतकऱ्यांवर आर्थिक संकट ओढवण्याची शक्यता असते. चोरी झालेल्या तारांची पुनर्बांधणी व विद्युत यंत्रणेची दुरुस्ती करण्यासाठी महावितरणलाही आर्थिक भार सहन करावा लागत आहे.
सहा महिन्यांत तीन गंभीर घटना
नशिराबाद परिसरात मागील सहा महिन्यांत वीजवाहिनीवरील ॲल्युमिनियम तार चोरीच्या तीन गंभीर घटना घडल्या आहेत. २० मे २०२६ रोजी गुन्हा क्रमांक १६९ अन्वये १७ विद्युत पोलवरील ॲल्युमिनियम तार चोरीला गेली. २३ ऑगस्ट २०२६ रोजी गुन्हा क्रमांक २३७ अन्वये २७ विद्युत पोलवरील तार चोरीला गेली. तर २९ सप्टेंबर २०२६ रोजी गुन्हा क्रमांक २६१ अन्वये १६ विद्युत पोलवरील ॲल्युमिनियम तार चोरीला गेली.या घटनांमुळे संबंधित भागातील शेतकऱ्यांचा वीजपुरवठा विस्कळीत झाला. दुष्काळी परिस्थितीत वीजपुरवठा खंडित झाल्याने पिकांना पाणी देण्यास अडथळा निर्माण होण्याची शक्यता आहे. त्यामुळे भविष्यात अशा घटना घडू नयेत, यासाठी पोलीस व महावितरणने परस्पर समन्वयातून प्रभावी उपाययोजना करण्याचा निर्धार व्यक्त केला.
रात्रीच्या हालचालींवर लक्ष
वीजवाहिन्यांच्या परिसरात रात्रीच्या वेळी होणाऱ्या संशयास्पद हालचालींवर विशेष लक्ष ठेवण्याबाबत बैठकीत चर्चा करण्यात आली. तसेच चोरीच्या ॲल्युमिनियम तारांची खरेदी-विक्री किंवा त्यांची विल्हेवाट लावणाऱ्या व्यक्तींवरही लक्ष ठेवण्याची आवश्यकता व्यक्त करण्यात आली.वीजवाहिनीवरील तार चोरीची घटना निदर्शनास येताच महावितरणकडून तातडीने पोलीस प्रशासनाला माहिती देणे, घटनास्थळी आवश्यक पंचनामा व कायदेशीर प्रक्रिया पूर्ण करणे आणि आरोपींवर कठोर कारवाईसाठी पोलीस प्रशासनाला आवश्यक सहकार्य करण्याबाबतही चर्चा झाली.
शेतकऱ्यांचा वीजपुरवठा सुरळीत ठेवण्यास प्राधान्य
दुष्काळाच्या परिस्थितीत शेतकऱ्यांचा वीजपुरवठा खंडित होऊ नये, तसेच महावितरणची विद्युत यंत्रणा सुरक्षित राहावी, यासाठी तार चोरीच्या घटनांना आळा घालणे आवश्यक आहे. या पार्श्वभूमीवर पोलीस प्रशासनाच्या सहकार्याने आवश्यक ती खबरदारी घेऊन संयुक्तपणे कार्यवाही करण्यावर बैठकीत भर देण्यात आला.दरम्यान, वीजवाहिनीवरील तार चोरी करणाऱ्या व्यक्तींबाबत किंवा रात्रीच्या वेळी विद्युत पोल व वाहिनीच्या परिसरात संशयास्पद हालचाल आढळल्यास नागरिकांनी तातडीने नशिराबाद पोलीस ठाणे अथवा महावितरणच्या संबंधित कार्यालयाशी संपर्क साधावा, असे आवाहन सहाय्यक अभियंता पवन सुधाकर वाघुळदे व सहाय्यक पोलीस निरीक्षक योगिता नारखेडे यांनी केले आहे.दुष्काळाच्या काळात शेतीसाठी सुरळीत वीजपुरवठा अत्यंत महत्त्वाचा असल्याने वीजवाहिनीवरील तार चोरी रोखण्यासाठी पोलीस प्रशासन व महावितरण यांच्यातील समन्वयातून करण्यात येणाऱ्या उपाययोजनांना विशेष महत्त्व प्राप्त झाले आहे.
