घराघरांत तीन स्वतंत्र कचरापेट्यांचे वाटप होणार; प्लास्टिकमुक्तीसाठी कापडी पिशव्या, रात्रीच्या स्वच्छतेसाठी अतिरिक्त मनुष्यबळाचा निर्णय
नशिराबाद | प्रतिनिधी | पोलीस दक्षता लाईव्ह :- नशिराबाद नगरपरिषदेच्या सर्वसाधारण सभेत शहरातील स्वच्छता, पायाभूत सुविधा, पर्यावरण संवर्धन आणि विविध विकासकामांशी संबंधित प्रस्तावांना एकमताने मंजुरी देण्यात आली. घरगुती कचऱ्याचे स्रोतस्थळीच वर्गीकरण करण्यासाठी प्रत्येक कुटुंबाला तीन स्वतंत्र कचरापेट्या उपलब्ध करून देण्याचा महत्त्वपूर्ण ठराव या सभेत संमत करण्यात आला. याशिवाय प्लास्टिकच्या वापराला आळा घालण्यासाठी कापडी पिशव्यांचे वितरण आणि शहरातील स्वच्छता व्यवस्था अधिक सक्षम करण्यासाठी रात्रीच्या वेळी सफाई कर्मचाऱ्यांची नियुक्ती करण्यासही मान्यता देण्यात आली.नगरपरिषदेच्या सर्वसाधारण सभेत उपस्थित नगरसेवक व नगरसेविकांनी शहराच्या विकासाशी संबंधित विविध प्रश्नांवर चर्चा करून आपल्या सूचना मांडल्या. नागरिकांच्या मूलभूत सुविधांबरोबरच सार्वजनिक आरोग्य आणि पर्यावरण संरक्षणाला प्राधान्य देणाऱ्या प्रस्तावांवर विचारविनिमय करण्यात आला. चर्चेअंती सभेपुढील सर्व विषयांना सदस्यांनी एकमताने मंजुरी दिली.
सभेत मागील सभेच्या इतिवृत्तास कायम करण्यासह नगरपरिषदेच्या गट क्रमांक १०३६ मधील खुल्या जागेवर पाण्याची टाकी उभारण्याच्या प्रस्तावावर विचारविनिमय करण्यात आला. तसेच शहरातील दिव्यांग लाभार्थ्यांना विविध योजनांचे लाभ वितरित करणे, सेवा संकल्प अभियान राबविणे व त्यासाठी आवश्यक खर्चास मान्यता देणे, पंधराव्या वित्त आयोगाच्या निधीतून विविध विकासकामे प्रस्तावित करणे आणि सामाजिक न्याय विभागामार्फत मंजूर कामांच्या पुढील कार्यवाहीसंबंधी निर्णय घेण्यात आले. नगराध्यक्षांच्या परवानगीने आयत्यावेळी उपस्थित करण्यात आलेल्या विषयांवरही चर्चा करण्यात आली.शहरातील स्वच्छता व्यवस्था अधिक परिणामकारक करणे, प्लास्टिकचा वापर कमी करणे आणि मंजूर विकासकामांना गती देण्याच्या दृष्टीने या सभेत विविध निर्णय घेण्यात आले. संबंधित उपक्रमांच्या प्रभावी अंमलबजावणीसाठी नागरिकांचा सहभाग महत्त्वाचा ठरणार असून, प्रत्येकाने घरापासूनच कचऱ्याचे वर्गीकरण करावे आणि स्वच्छ, सुंदर व प्लास्टिकमुक्त नशिराबादच्या संकल्पनेला सहकार्य करावे, असे आवाहन नगरपरिषदेच्या वतीने करण्यात आले.
