नशिराबादमध्ये सेवा संकल्प अभियानांतर्गत भाजपतर्फे रांगोळी स्पर्धा

महिलांनी सामाजिक संदेशांसह साकारल्या आकर्षक रांगोळ्या

नशिराबाद | प्रतिनिधी | पोलीस दक्षता लाईव्ह:- नशिराबाद येथे भारतीय जनता पक्षाच्या वतीने पंतप्रधान नरेंद्र मोदी यांच्या सार्वजनिक जीवनातील २५ वर्षांच्या सेवेला अभिवादन करण्याच्या उद्देशाने ‘सेवा संकल्प अभियान’ अंतर्गत रांगोळी स्पर्धेचे आयोजन करण्यात आले.या स्पर्धेला विविध मंडळांकडून उत्स्फूर्त प्रतिसाद मिळाला. मंडळातील महिला तसेच कार्यकर्त्यांनी आपल्या कलाकृतीतून विविध सामाजिक विषयांवर जनजागृती करणाऱ्या आकर्षक व कल्पक रांगोळ्या साकारल्या. देशप्रेम, ‘बेटी बचाव, बेटी पढाव’, सक्षम भारत यांसह सामाजिक बांधिलकी आणि सकारात्मक विचारांचे दर्शन या रांगोळ्यांमधून घडविण्यात आले.
या उपक्रमाच्या माध्यमातून महिलांच्या तसेच मंडळातील कार्यकर्त्यांच्या कलागुणांना व्यासपीठ मिळाले. त्याचबरोबर सेवा, राष्ट्रप्रेम, सामाजिक जाणीव आणि सकारात्मक विचारांचा संदेश देण्याचा प्रयत्न करण्यात आला.कार्यक्रमाला डॉ. विश्वनाथ महाजन, शिक्षिका सीमा पाटील, मिलिंद देशपांडे व माधव पाटील यांचे पर्यवेक्षक म्हणून मार्गदर्शन लाभले. यावेळी नगराध्यक्ष योगेश पाटील, नगरसेवक लालचंद पाटील, मनोज पाटील, प्रदीप बोढरे, सुवर्णा महाजन, रूपाली पाटील व सुनंदा पाटील यांची उपस्थिती होती.
कार्यक्रमाचे सूत्रसंचालन विनोद रंधे यांनी केले, तर आभार राजेंद्र पाचपांडे यांनी मानले.